បរិយាកាសសាលារៀនដែលជះឥទ្ធិពលលើ គុណភាពអប់រំ

បរិយាកាសសាលារៀនដែលជះឥទ្ធិពលលើ គុណភាពអប់រំ

ជំពួកទី១

សេចក្ដីផ្ដើម

១.១ សាវតា និងហេតុផលនៃការសិក្សាស្រាវជ្រាវ

គុណភាពនៃការអប់រំគឺជាចំណុចដៅលេខ៤នៃការអភិវឌ្ឍន៍និរន្តរភាពរបស់ពិភពលោក ដើម្បីផ្លាស់ប្ដូរជីវិត ធ្វើឱ្យប្រសើរឡើងតាមរយះការអប់រំបណ្ដុះបណ្ដាល។សេចក្ដីថ្លែងការណ៍ទីក្រុងអ៊ីន ឈុនសម្រាប់វិស័យអប់រំឆ្នាំ២០៣០ដែលកំណត់នូវចក្ខុវិស័យថ្មីមួយសម្រាប់វិស័យអប់រំរយះពេល១៥ឆ្នាំ។ ចក្ខុវិស័យនេះបានស្នើឡើងថា ធានាឱ្យបាននូវការអប់រំមានគុណភាព បរិយាប័ន្ន សមធម៌ រួមទាំងលើកកំពស់ឱកាសការសិក្សាពេញមួយជីវិតសម្រាប់ទាំងអស់គ្នា[1]។

ដើម្បីឆ្លើយតបទៅនិងតម្រូវការពលកម្មទីផ្សា ប្រទេសនានានៅក្នុងតំបន់ត្រូវតែផលិតឱ្យបាននូវធនធានមនុស្សដែលមានគុណភាពតាមរយះការអប់រំបណ្ដុះបណ្ដាល ជាពិសេសប្រទេសនៅក្នុងតំបន់អាស៊ីអាគ្នេយ៍ដែលហៅកាត់ថាអាស៊ាន។ក៏ប៉ុន្ដែការវាស់ស្ទង់ឱ្យដឹងថាតើគុណភាពអប់រំឋិតនៅត្រង់ណា និងអាចទទួលស្គាល់បានប៉ុណ្ណានៅតែជាបញ្ហាចោទដែលទាមទារឱ្យមានការសិក្សាស្រាវជ្រាវយ៉ាងយកចិត្តទុកដាក់បំផុត។

កម្ពុជាជាប្រទេសមួយនៃសមាជិកអាស៊ាន ដែលត្រៀមខ្លួនក្នុងការធ្វើសមាហរណកម្មក្នុងតំបន់ ដូច្នេះហើយគុណភាពនៃវិស័យអប់រំត្រូវដើរតួរយ៉ាងសំខាន់ក្នុងការអភិវឌ្ឍន៍សមត្ថភាពខ្លួនដើម្បីដើរឱ្យទាន់បរិបទសេដ្ឋកិច្ចទីផ្សារផងដែរ។ដើម្បីឆ្លើយតបទៅនឹងសេចក្ដីត្រូវការមួយនេះ រាជរដ្ឋាភិបាលកម្ពុជាបានរៀបចំដាក់ចេញនូវផែនការយុទ្ធសាស្រ្តចតុកោណដំណាក់កាលទី៤ ក្នុងការរៀបចំកែសម្រួល និងឆ្លុះបញ្ចាំងឡើងវិញនូវវិស័យអាទិភាព៤ ដែលក្នុងនោះមានវិស័យអប់រំជាចតុកោណទី១ ផ្ដោតទៅលើការអភិវឌ្ឍន៍ធនធានមនុស្ស ដែលមានធាតុផ្សំចំនួន៤ គឺ(១)ការពង្រឹងគុណភាពវិស័យអប់រំ វិទ្យាសាស្រ្ត និងបច្ចេកវិទ្យា (២) ការបណ្ដុះបណ្ដាលជំនាញបច្ចេកទេស (៣)ការលើកកម្ពស់សេវាសុខភាពសាធារណៈ និងអាហារូបត្ថម្ភ និង(៤)ការពង្រឹងសមភាពយេនឌ័រ និងការគាំពារសង្គម[2]។

សាលារៀនសាធារណៈនានាចាប់ពីបឋមសិក្សាដល់ឧត្តមសិក្សានៅក្នុងប្រទេសកម្ពុជា មានតួនាទីសំខាន់ក្នុងការអនុវត្តគោលនរយោបាយរបស់ក្រសួងអប់រំ យុវជន និងកីឡាលើការធានាគុណភាពអប់រំ។សមត្ថភាពរបស់នាយកសាលាលើការដឹកនាំគ្រប់គ្រង និងត្រួតពិនិត្យតាមដាន និងវាយតម្លៃជាកត្តាសំខាន់ក្នុងការធានាគុណភាពអប់រំ។ សមត្ថភាពលោកគ្រូអ្នកគ្រូលើការដឹកនាំការរៀន និងបង្រៀន គំនិតច្នៃប្រឌិត បង្កើតសម្ភារបង្រៀនថ្មីៗ ​កម្រឹតគុណវុឌ្ឍិ និងការស្រាវជ្រាវវិធីសាស្រ្តបង្រៀនថ្មីនឹងជំរុញឱ្យមានការចាប់អារម្មណ៏ពីសិស្សានុសិស្សព្រមទាំងសហគមន៍ផងដែរ។លើសពីនេះទៀតការចូលរួមយ៉ាងសកម្មពីគណៈកម្មការទ្រទ្រងសាលារៀន សមាគមន៍មាតាបិតាសិស្សលើការពិនិត្យតាមដាន និងសង្កេតមើលលទ្ធផលសិក្សារបស់កូនចៅពួកគាត់ជាកញ្ចក់ឆ្លុះបញ្ចាំងពីប្រសិទ្ធិភាពនៃការដឹកនាំ។

វាពិតជាមានសារៈសំខាន់ខ្លាំងណាស់​ដែលការសិក្សាស្រាវជ្រាវអំពីការត្រួតពិនិត្យាតាមដាន និងវាយតម្លៃលើបរិយាកាសសាលារៀន ដើម្បីស្វែងយល់ពីប្រសិទ្ធភាពនៃការដឹកនាំគ្រប់គ្រងការអប់រំនៅកម្រឹតមធ្យមសិក្សានេះ។លើសពីនេះទៅទៀតក្នុងការសិក្សានេះ ក៏ជាឧបករណ៏ជំនួយសម្រាប់ធ្វើការកែលម្អគុណភាពអប់រំនៅក្របខ័ណ្ឌមួយនេះផងដែរ។

១.២.សំណួរស្រាវជ្រាវ

ក្នុងការសិក្សាស្រាវជ្រាវនេះមានបំណងឆ្លើយតបទៅនឹងសំណួរដូចខាងក្រោម៖

តើបរិយាកាសអប់រំនៅសាលាមធ្យមសិក្សាបឋមភូមិមានគុណភាពកម្រឹតណា?

១.៣.សម្មតិកម្ម

          គុណភាពអប់រំនៅសាលាមធ្យមសិក្សាបឋមភូមិប្រឈមនិងកត្តាពីរគឺកត្តាបរិយាកាសសាលា និង ប្រសិទ្ធភាពនៃការរៀន និងបង្រៀន

១.៤.គោលបំណងនៃការស្រាវជ្រាវ

          ១.គោលបំណងរួម

          សិក្សាស្វែងយល់អំពីបរិយាកាសសាលារៀន និងប្រសិទ្ធភាពនៃការរៀន និងបង្រៀនដែលជះឥទ្ធិពលលើលទ្ធផលសិក្សារបស់សិស្សនៅកម្រឹតមធ្យមសិក្សាបឋមភូមិ។

          ២.គោលបំណងជាក់លាក់

o   ស្វែងយល់ពីទំនាក់ទំនងនៃបរិយាកាសសាលារៀន និងគុណភាពអប់រំ

o   ស្វែងយល់ពីប្រសិទ្ធភាពនៃការរៀន និង បង្រៀន

o   ស្វែងយល់ពីកម្រឹតនៃការចូលរួមរបស់មាតាបិតាជាមួយនិងសាលារៀន

១.៥.សារះសំខាន់នៃការស្រាវជ្រាវ

          ការស្រាវជ្រាវនេះនឹងផ្ដល់អត្ថប្រយោជន៍ជាច្រើនដល់អ្នកពាក់ព័ន្ធផ្នែកអប់រំជាបឋមចំពោះអ្នកស្រាវជ្រាវខ្លួនឯងដើម្បីបំពេញលក្ខ័ណបញ្ចប់ការសិក្សាកម្រឹតបរិញ្ញាប័ត្រជាន់ខ្ពស់របស់សាកលវិទ្យាល័យមានជ័យអមដោយការទទួលបានបទពិសោធន៍ និងចំណេះដឹងមួយច្បាស់លាស់ពាក់ព័ន្ធជំនាញធានាគុណភាពអប់រំ។រីឯចំពោះគណៈគ្រប់គ្រងសាលាវិញការសិក្សានេះបម្រើជាឧបករណ៍កែលម្អគុណភាពអប់រំនៅក្នុងសាលារៀនដែលគាត់កំពុងគ្រប់គ្រងដឹកនាំ។ការសិក្សាស្រាវជ្រាវនេះក៏អាចជួយដល់សហគមន៍ មាតាបិតាទទួលស្គាល់ពីតួនាទីរបស់ខ្លួនក្នុងការរួមចំណែកលើកកម្ពស់គុណភាពអប់រំចំពោះកូនចៅបុត្រាបុត្រីរបស់ពួកគាត់ផងដែរ។ហើយអត្ថប្រយោជន៏ចុងក្រោយចំពោះអ្នកសិក្សាស្រាវជ្រាវជំនាន់ក្រោយធ្វើជាឯកសារយោងមួយដ៏មានតម្លៃក្នុងការតម្រង់ផ្លូវពាក់ព័ន្ធនិងការធានាគុណភាពផ្នែកអប់រំ។

១.៦.ដែលកំណត់នៃការស្រាវជ្រាវ

          ការសិក្សានេះនិងធ្វើឡើងនៅក្នុងក្រុងសិរីសោភ័ណ ខេត្តបន្ទាយមានជ័យនៅក្នុងសាលាអនុវិទ្យាល័យទឹកថ្លាក្នុងសង្កាត់ទឹកថ្លាក្រុងសិរីសោភ័ណ ខេត្តបន្ទាយមានជ័យ ក្នុងឆ្នាំសិក្សា២០១៨-២០១៩។

ជំពួកទី២

សំយោគបណ្ណាល័យសាស្រ្ត

២.១.បរិយាកាសជុំវិញសាលារៀន

          ២.១.១ បរិស្ថានសាលារៀន

ពាក្យថាបរិយាកាសសាលារៀនពិតជាមានភាពស្មុកស្មាញពិបាកបកស្រាយ ហើយកត្តាពាក់ព័ន្ធជាច្រើនដូចជាសុវត្តិភាពផ្លូវកាយ និងចិត្ត សំណងអគារ ទំនាក់ទំនងរវាងការរៀន និងបង្រៀន ទំនាក់ទំនងរវាងសិស្ស និងគ្រូជាដើម។ បរិយាកាសទាំងក្នុង និងក្រៅថ្នាក់ ឬក្រៅសាលាបង្កភាពងាយស្រួលដល់ការសិក្សារបស់សិស្សានុសិស្សមានរបង ក្លោងទ្វារ  និងសំណង់អគារសិក្សារឹងមាំល្អ ផ្លូវស្អាត ខ្វាត់ខ្វែងជាលក្ខណៈបេតុងភ្ជាប់ពីអគារមួយទៅអគារមួយទៀត មានទីធ្លាធំទូលាយ មានដើមឈើ មានអនាម័យ បង់អង្គុយលេង មានធុងសម្រាម និងសួនច្បារតាម មុខអគារ និងមានដងទង់ជាតិ។

២.១.២ បរិស្ថានថ្នាក់រៀន

នៅក្នុងថ្នាក់រៀនមានសភាពស្អាតជានិច្ច មានកង្ហាល់គ្រប់បន្ទប់ គ្មានភក់ជ្រាំ មានវាំងនន ថូផ្កា ធុងទឹក បាវវចនាជាតិ ព្រះឆាយាល័ក្ខព្រះមហាក្សត្រ តារាងរដ្ឋបាលថ្នាក់ទាំង៩ សុភាសិត រូបភាពផ្សេងៗពាក់ព័ន្ធនិងមុខវិជ្ជាសិក្សា រូបមន្ត និងស្នាដៃសិស្សជាដើម។[3]

២.១.៣ បរិយាកាសនៃការដឹកនាំគ្រប់គ្រង

Gerard Egan បានពិព័ណ៌នាថា” លក្ខណៈគ្រប់គ្រងដែលមានបែបបទជាសកម្មភាព និងការរៀបចំសំខាន់ៗទាំងអស់មិនទាន់ត្រូវបានគេកំណត់ ពិភាក្សា និងគ្រប់គ្រងបាននៅឡើយទេ” តែផ្ទុយទៅវិញ John Sullivan បានជំទាស់ថា” រូបភាពនៃទម្រង់គ្រប់គ្រងនានា គឺជាការពាក់ព័ន្ធនិងការយល់ដឹងអំពីលក្ខណៈពិសេសមួយចំនួននៃសាលារៀន។ តួនាទីនៃភាពជាអ្នកដឹកនាំរបស់ប្រធានគឺវាពាក់ព័ន្ធនិងគំលាតនៃបេសសកកម្ម និងការអនុវត្តការងារ ហើយនឹងលក្ខណៈបែបបទនៃអង្គភាព។ភាពជាអ្នកដឹកនាំគ្រប់គ្រងសាលារៀននឹងក្រើនរំលឹកពួកយើងឱ្យចូលរួមយ៉ាងប្រុងប្រយ័ត្នចំពោះចំណុចនៃការដឹកនាំ ហើយនិងមធ្យោបាយដែលពាក់ព័ន្ធនិងការទំនាក់ទំនង និង ការបញ្ចុះបញ្ជូលប្រកបដោយក្រមសីលធម៌។[4]

ជារួមការដឹកនាំគ្រប់គ្រងសាលារៀនប្រកបដោយក្រមសីលធម៌វិជ្ជាជីវៈខ្ពស់ នឹងនាំមកនូវតម្លៃ និងការចោលស្រមោលគ្រប់គ្រងល្អដល់អង្គភាព។

រដ្ឋបាលសាលារៀនអាចត្រូវបានផ្ដល់និយមន័យថាជាប្រព័ន្ធនៃការរៀបចំធនធានមនុស្ស និងធនធានសម្ភារៈរួមទាំងសកម្មភាពដែលរៀបចំដើម្បីសម្រេចបាននូវគោលដៅអប់រំនៅកម្រឹតសិក្សាណាមួយ។នាយកសាលាត្រូវបានគេចាត់ទុកថាជាមន្រ្តីសំខាន់បំផុតក្នុងការអនុវត្តការងារជាប្រព័ន្ធនេះ។ គាត់ត្រូវប្រឹងឱ្យអស់ពីសមត្ថភាពអនុវត្តកិច្ចការរដ្ឋបាលល្អជាច្រើនដើម្បីសម្រេចបានគោលដៅ និងវត្ថុបំណងដែលសាលារៀនមានបំណងចង់ឱ្យសម្រេចបាន។មន្រ្តីរដ្ឋបាលសាលារៀនអាចញាំងកិច្ចការរដ្ឋបាលឱ្យទទួលបានជោគជ័យ និងមានប្រសិទ្ធដោយអនុវត្តតាមគោលការគ្រឹះសំខាន់ដូចខាងក្រោម៖

១.បង្កើតផែនការ

២.រៀបចំ និងបែងចែកផែនការ

៣.ណែនាំ និង ត្រួតពិនិត្យការងារ

៤.សម្របសម្រួល

៥.គ្រប់គ្រងផែនការ

៦.ធ្វើសេចក្ដីសម្រេចចិត្ត[5]

ការសិក្សាស្រាវជ្រាវមួយទៀតបានរកឃើញអំពីទំនួលខុសត្រូវចំនួន២១ចំណុចចំពោះអ្នកដឹកនាំសាលារៀន[6] ។ទំនួលខុសត្រូវទាំងនោះរួមមាន

(១) ទទួលខុសត្រូវលើ ការបរាជ័យរបស់សាលា និងអោយតម្លៃលើស្នាដៃរបស់គ្រូ សិស្សជាលក្ខណៈប្រព័ន្ធ និងយុត្តិធម៌ (Affirmation)

(២) ទទួលខុសត្រូវលើបម្រែបម្រួលស្ថានការណ៏ដោយមានឆន្ទះផ្ដួចផ្ដើមការផ្លាស់ប្ដូរស្វែងរកមធ្យោបាយថ្មីល្អទោះជាត្រូវប្រឈមនឹងលទ្ធផលដែលមិនជាក់លាក់ និងត្រូវធ្វើការក្នុងជ្រុងមួយនៃការប្រគួតប្រជេងរបស់សាលាប្រឆាំងនឹងចំណុចកណ្ដាលនៃការប្រគួតប្រជេងរបស់សាលា (Change Agent)

(៣) ប្រើប្រាស់ការខិតខំធ្វើការ និង លទ្ធផលជាភាពលម្អៀតក្នុងការផ្ដល់រង្វាន់ និងការទទួលស្គាល់ ឬប្រើប្រាស់ការអនុវត្តការងារជំទាស់នឹងភាពចាស់ជាងជាលក្ខណៈវិនិច្ឆ័យដំបូងក្នុងផ្ដល់រង្វាន់ និងការទទួលស្គាល់ ( Contingent Rewards )

(៤) ធ្វើខ្លួនជាបុគ្គលសាម័ញ្ញ ឬផ្ដល់ភាពងាយស្រួល​ដោយបើកទូលាយក្នុងការទំនាក់ទំនងរវាងគ្រូ សិស្ស និងបុគ្គលិកផ្សេងៗ ( Communication )

(៥) ផ្សព្វផ្សាយ និងបង្កើតវប្បធម៌ក្នុងអង្គភាពដើម្បីរឹតចំណងមិត្តភាព ស្វែងយល់ពីសុខមាលភាពបុគ្គលិក យល់ដឹងពីគោលបំណង និងចែករំលែកចក្ខុវិស័យរបស់អង្គភាព( Culture )

(៦) ការពារគ្រូពីការរំខានខាងក្នុង និងខាងក្រៅ ព្រមទាំងក្នុងម៉ោងបង្រៀន( Discipline )

(៧) បត់បែន សម្របខ្លួនតាមរបៀបដឹកនាំ និងស្ថានភាព ត្រូវបង្គាប់បញ្ជា ឬមិនបញ្ជាពេលដែលស្ថានភាពធ្វឱ្យមានភាពចាំបាច់ លើកទឹកចិត្តឱ្យបុគ្គលិកបញ្ចេញគំនិតផ្សេងៗ និងជំទាស់ប្រឆាំង និងធ្វើឱ្យមានកកក្ដៅជាមួយវិធីដែលធ្វើឱ្យសម្រេចបាននូវការផ្លាស់ប្ដូរដ៏ធំធេង( Flexibility )

(៨) កសាងគោលបំណងមូលដ្ឋានសម្រាប់កម្មវិធីសិក្សា ការបង្រៀន ការវាយតម្លៃការអនុវត្តក្នុងសាលារៀន និងគោលបំណងនៃការងារទូទៅនៃសាលាដោយមានក្ដីរំពឹងទុកខ្ពស់អំពីផលសម្រេចរបស់សិស្សានុសិស្ស( Focus )

(៩) គ្រប់គ្រង ចែលរំលែក និងចង្អុរបង្ហាញនូវជំនឿជាក់ដែលបង្ហាញយ៉ាងច្បាស់អំពីសាលារៀន ការរៀន និងបង្រៀន ( Ideas/ Beliefs )

(១០) ផ្ដល់ឱកាសដល់បុគ្គលិកក្នុងការចូលរួមអភិវឌ្ឍគោលនយោបាយសាលារៀន​ដោយដាក់បញ្ជូលនូវធាតុចូលសំខាន់ៗ និងប្រើប្រាស់ក្រុមជាការធ្វើសេចក្ដីសម្រេចចិត្ត( Input )

(១១) បង្ហាញ ប្រាប់ ជាបន្តបន្ទាប់ និងលើកទឹកចិត្តដល់ការពិភាក្សាជាប្រព័ន្ធ ដល់បុគ្កលិកនូវការស្រាវជ្រាវ និងទ្រឹស្ដីថ្មីៗទំនើបអំពីការអប់រំនៅសាលា( Intellectual Stimulation )

(១២) ចូលរួមដោយផ្ទាល់ជាមួយលោកគ្រូ អ្នកគ្រូក្នុងការជួយរចនាសកម្មភាពកម្មវិធីសិក្សា ជួយដោះស្រាយបញ្ហាវាយតម្លៃ និងបញ្ហាបង្រៀន(Involvement in Curriculum,​ Instruction, and Assessment)

(១៣) គ្រប់គ្រងចំណេះពាក់ព័ន្ធនិងការអនុវត្តការបង្រៀន កម្មវិធីសិក្សា និងការវាយតម្លៃមានប្រសិទ្ធភាពឱ្យបានច្រើន ព្រមទាំងផ្ដល់ការណែនាំផ្អែកលើគោលគំនិតអំពីការអនុវត្តថ្នាក់រៀនមានប្រសិទ្ធភាព (Knowledge of curriculums , Instructions and Curriculums)

(១៤) ធ្វើការត្រួតពិនិត្យតាមដាន និងវាយតម្លៃជាបន្តបន្ទាប់នូវប្រសិទ្ធភាពនៃការអនុវត្តន៍កម្មវិធីសិក្សា ការបង្រៀន និងការវាយតម្លៃឱ្យដឹងពីផលប៉ះពាល់លើសេចក្ដីសម្រេចរបស់សិស្ស

( Monitoring/Evaluating )

            (១៥) បណ្ដុះគំនិត ឬញាំងគ្រូឱ្យហ៊ានសម្រេចរឿងរ៉ាវដែលមិនអាចទៅរួច ជាកំលាំងជំរុញពីក្រោយគំនិតផ្តួចផ្ដើម លើកឡើងពីឥរិយាបថវិជ្ជមានសមត្ថភាពបុគ្គលិកដែលសម្រេចបានស្នាដៃធំធេង មានតម្លៃ ឬសំខាន់ៗ( Optimizer )

            (១៦) បង្កើតទំលាប់ការងារដោយរលូនដែលបុគ្គលិកយល់ និងធ្វើតាម ផ្ដល់ និងពង្រឹងរចនាសម្ព័ន្ធ វិន័យ និងនិតិវិធីច្បាស់លាស់ដល់បុគ្គលិក និង សិស្ស ( Order )

            (១៧) ធានាបានថាសាលារៀនអនុលោមទៅតាមបទបញ្ជាថ្នាក់រដ្ឋ និងស្រុក ជាអ្នកការពារ គាំទ្ររបស់សាលារៀនជាមួយអាណាព្យបាលសិស្ស ការិយាល័យកណ្ដាល ក្រមប្រឹក្សា និងសហគមន៍(Outreach)

            (១៨) យល់ដឹងពីផលវិបាកផ្ទាល់ខ្លួនរបស់បុគ្គលិក តម្រូវការបុគ្គលិក ព្រឹត្តិការណ៍កើតឡើងក្នុងជីវិតបុគ្គលិក និងធានាបាននូវទំនាក់ទំនងល្អជាមួយបុគ្គលិក(Relationship)

            (១៩) ធានាបានថាគ្រូមានឧបករណ៏ សម្ភារឧបទេសជាចាំបាច់ និងឱកាសអភិវឌ្ឍសមត្ថភាពបុគ្គលិកដើម្បីពង្រឹងការបង្រៀន(Resources)

            (២០) គិតទុកមុនឱ្យបានត្រឹមត្រូវនូវបញ្ហាដែលនិងកើតមានពីមួយថ្ងៃទៅមួយថ្ងៃ ដឹងពីក្រុម និងទំនាក់ទំនងក្រៅផ្លូវការរវាងបុគ្គលិក ដឹងពីបញ្ហាដែលមិនបង្ហាញចេញមកក្រៅតែអាចឈានដល់ការបង្កជម្លោះ(Situational Awareness)

            (២១) បង្កើតការចុះមើលថ្នាក់រៀនជាប្រចាំ និងជាប្រព័ន្ធ និងទំនាក់ទំនងសិស្ស គ្រូ និងឪពុកម្ដាយសិស្សជាទៀងទាត់ (Visibility)

            ជារួមប្រសិទ្ធភាពសាលារៀនមានទំនាក់ទំនងដោយផ្ទាល់ទៅនិងថ្នាក់ដឹកនាំសមត្ថភាពនាយកសាលាក្នុងការជ្រើសរើសកិច្ចការដែលត្រឹមត្រូវប្រកបដោយភាពឆ្លាតវៃដើម្បីធ្វើឱ្យប្រសើរឡើងនូវផលសម្រេច និងការសិក្សារបស់សិស្ស។

២.២ ប្រសិទ្ធភាពនៃការរៀន និងបង្រៀន

          ២.២.១ ការសិក្សារបស់សិស្សប្រកបដោយគុណភាព

១.ភាពទៀងទាត់នៃការសិក្សា

សិស្សដែលដឹងខ្លួនជាមុន និងត្រៀមសិក្សានៅសាលារៀនជារៀងរាល់ថ្ងៃ ទទួលបាននូវឱកាសនៃការសិក្សាជាច្រើនដែលបានផ្ដល់ជូន។វត្តមានរបស់សិស្សគឺជាការរួមចំណែកក្នុងធនធានសាលារៀនផងដែរ ព្រោះថាថវិកាទ្រទ្រងសាលារៀនទទួលបានពីចំនួនសិស្ស ពេលសិស្សអវត្តមានញឹកញាប់ធ្វើឱ្យពួកគេនឿយណាយក្នុងការសិក្សា និងឈានដល់ការបោះបង់ការសិក្សា ហើយកាលណាចំនួនសិស្សចេះតែថយពីមួយឆ្នាំទៅមួយឆ្នាំថវិកាទ្រទ្រង់សាលារៀនក៏កាត់បន្ថយផងដែរ។លើសពីនេះទៀតសិស្សដែលមករៀនមិនទាន់ម៉ោង ឬគេចវេសពិសាលានឹងបណ្ដាលឱ្យការសិក្សាខ្សោយ ឬអាចពាក់ព័ន្ធអំពើពាលា និងឧក្រិតកម្មផ្សេងៗ។[7]

២.អាហាររូបត្ថម្ភ

អនាម័យ សុវត្តិភាពចំណីអាហារ ពេលវេលសម្រាក់របស់សិស្សានុសិស្សជះឥទ្ធិពលដល់សុខភាពផ្លូវកាយ និងចិត្ត ព្រមទាំងលទ្ធផលនៃការសិក្សារៀនសូត្រ របស់ពួកគេផងដែរ។ គោលនយោបាយសុខមាលភាពសាលារៀន ពិតជាជះឥទ្ធិពលលើបរិស្ថានចំណីអាហារ និង ឥរិយាបថនៃរបបអាហារ។​ការសិក្សាមួយបានរកឃើញថា សិស្សមធ្យមសិក្សាបរិភោគ ទឹកដោះគោ បន្លែ និងផ្លែឈើច្រើនសម្រាប់អាហារថ្ងៃត្រង់[8]

៣.ការស្វ័យសិក្សា

ស្វ័យសិក្សា គឺជាវិធីសាស្រ្តសិក្សាដោយផ្អែកលើបញ្ហាតាមបែបសិស្សមជ្ឈមណ្ឌល។ ដើម្បីអភិវឌ្ឍការយល់ដឹងស៊ីជម្រៅបន្ទាប់ពីការចង្អុរបង្ហាញរបស់លោកគ្រូអ្នកគ្រូ ការសិក្សាដោយខ្លួនឯងឬជាក្រុមនិងជួយអ្នកសិក្សាអាចស្វែងរកដំណោះស្រាយទៅបញ្ហាសិក្សាតាមរយះការស្រាវជ្រាវ និងពិភាក្សា។ ការសិក្សាដដែលនេះបានបង្ហាញពីសារៈសំខាន់នៃស្វ័យសិក្សាចំនួនពីរ គឺ

១.សិស្សមានអារម្មណ៏ថាខ្លួនឯងមានបន្ទុក និងមានឥទ្ធិពលជាក់ស្ដែងលើស្ថានភាពសិក្សារបស់ពួកគេ ដែលសំខាន់សម្រាប់ពួកគេក្នុងការចង់ទទួលខុសត្រូវ។

២.អារម្មណ៏នៃការទទួលបន្ទុក់បានផ្សារផ្ជាប់និងការយល់ដឹងពីតម្រូវការនៃបរិបទសិក្សា បទពិសោធន៍នៃការគ្រប់គ្រង និងទទួលបានការផ្ដល់ព័ត៌មានត្រឡប់[9]

៤.ចិត្តសាស្រ្តសង្គម

សិស្សជាធម្មតាមិនរៀនតែម្នាក់ឯងនោះទេ ផ្ទុយទៅវិញពួកគេចង់សិក្សាជាលក្ខណៈសហការជាមួយគ្រូរបស់ពួកគេ មិត្តភក្កិ និងការជំរុញលើកទឹកចិត្តពីអាណាព្យាបាល។ការរំជួលចិតអាសម្រួល ឬបង្អាក់សមរភូមិសិក្សារបស់ពួកគេ ក្របសីលធម៌ការងារ ការតាំងចិត្ត និង ភាពជោគជ័យនៅសាលារៀនទាំងស្រុង ព្រោះថាដំណើរការនៃអារម្មណ៏ និងទំនាក់ទំនងមិត្តភាពជះឥទ្ធិពលលើរៀ

បដែលសិស្សរៀន និងអ្វីដែលសិស្សរៀន។[10]

          ២.២.២ កត្តាកម្មវិធីសិក្សា

          កម្មវិធីសិក្សាចំណេះទូទៅ និងបច្ចេកទេស

ü  សមត្ថភាពភាសាខ្មែរ និងភាសាបរទេសលើបំណិនទាំង៤ឱ្យបានច្បាស់លាស់

ü  ចំណេះដឹងគណិតវិទ្យា វិទ្យាសាស្រ្ត កុំព្យូទ័រសម្រាប់មូលដ្ឋានក្នុងការបន្តការសិក្សាបន្តបន្ទាប់

ü  បំណិនសិល្បៈ សុខភាព កីឡា​សោភ័ណភាព នវានុវត្តន៍ និងពលរដ្ឋគំរូ

ü  យល់ដឹងពីការបំពេញកាតព្វកិច្ច និងការប្រើប្រាស់សិទ្ធពលរដ្ឋដែលមានការទទួលខុសត្រូវ

ü  ស្មារតី ស្រលាញ់ការពារ និងកសាងជាតិមាតុភូមិ និងពូជសាសន៍

ü  កម្មវិធីសិក្សាប្រឹក្សាអាជីព[11]

          ២.២.៣ កត្តាគ្រូ

          ដើម្បីអភិវឌ្ឍធនធានមនុស្សឱ្យឆ្លើយតបនឹងបរិបទសកលភាវូបនីយកម្ម ក្រសួង អប់រំ យុវជន និងកីឡាបានបង្កើតគោលនយោបាយអភិវឌ្ឍ និងគ្រប់គ្រងធនធានមនុស្សក្នុងវិស័យអប់រំ ក្នុងនោះគោលនយោបាយស្ដីពីគ្រូបង្រៀនត្រូវបង្កើតឡើងជាអាទិភាព។ការអប់រំនៅមូលដ្ឋានមានគុណភាព ត្រូវពឹងផ្អែកលើសមត្ថភាពរបស់បុគ្កលិកសិក្សាជាគ្រូបង្រៀន។គោលនយោបាយស្ដីពីគ្រូបង្រៀននេះនឹងធានាឱ្យគ្រូបង្រៀនមានចំណេះដឹង ជំនាញ សីលធម៌ និងសមត្ថភាពអនុវត្តជំនាញវិជ្ជាជីវៈតាមរយះការបណ្ដុះបណ្ដាលមុនពេលបំពេញការងារ និងក្នុងពេលបំពេញការងារ។គោលនយោបាយនេះកំណត់បាននូវយុទ្ធសាស្រ្ត៩ចំណុចដូចខាងក្រោម៖[12]

            ១.ទាក់ទាញអ្នកមានសមត្ថភាពឱ្យចូលធ្វើគ្រូ

            ២.កម្មវិធីបណ្ដុះបណ្ដាលគ្រូបង្រៀន

            ៣.រៀបចំប្រព័ន្ធគ្រប់គ្រងគ្រូបង្រៀន

            ៤.ការអភិវឌ្ឍន៍ជំនាញវិជ្ជាជីវៈគ្រូបង្រៀន

            ៥.លើកទឹកចិត្ត និងរក្សាទុកគ្រូបង្រៀន

            ៦.ពង្រឹងភាពជាអ្នកដឹកនាំសាលារៀនរបស់នាយកសាលា

            ៧.ពង្រឹងប្រព័ន្ធត្រួតពិនិត្យតាមដាន និងវាយតម្លៃ

            ៨.កំណត់ស្ដង់ដាប្រព័ន្ធបណ្ដុះបណ្ដាលគ្រូបង្រៀន

            ៩.ធ្វើសនិទានកម្មគ្រូបង្រៀនឱ្យឆ្លើយតបទៅនឹងតម្រូវការរបស់គ្រឹះស្ថានសិក្សា

          ២.២.៤ កត្តាអាណាព្យាបាល

          មាតាបិតា ឬអាណាព្យាបាលសិស្ស និង សហគមន៍មានតួនាទីយ៉ាងសំខាន់ក្នុងការត្រួតពិនិត្យតាមដាន និង វាយតម្លៃលើលទ្ធផលសិក្សារបស់សិស្ស

២.២.៤.១ សិទ្ធ និងការយល់ដឹងរបស់មាតាបិតាសិស្ស

·         តើគ្រូបង្រៀននោះ បានបំពេញតាមលក្ខណៈវិនិច្ឆ័យលើគុណសម្បត្តិ និងអាជ្ញាប័ណ្ណរបស់រដ្ឋ សម្រាប់កម្រឹតថ្នាក់ និងមុខវិជ្ជានានាដែលគ្រូបានបង្រៀនដែរឬទេ។

·         តើគ្រូបង្រៀនកំពុងបង្រៀនតាមស្ថានភាពអាសន្ន ឬបណ្ដោះអាសន្ន ដែលមានការលើកលែងចំពោះគុណសម្បត្តិ ឬការផ្ដល់អាជ្ញាប័ណ្ណពីរដ្ឋដែរឬយ៉ាងណា?

·         មុខជំនាញបរិញ្ញាបត្ររបស់គ្រូបង្រៀន និងវីញ្ញាបនបត្របញ្ចប់ការសិក្សា ឬសញ្ញាបត្រផ្សេងៗ ដែលគ្រូបង្រៀននោះកាន់ ហើយនិងមុខវិជ្ជានៃវិញ្ញាបនបត្រ ឬសញ្ញាបត្រ

·         ថាតើកុមារត្រូវផ្ដល់ឱ្យនូវសេវាដោយគ្រូជំនួយ ប្រសិនបើមាន និងគុណសម្បត្តិរបស់ពួកគេ

២.២.៤.២ ចូលរួមគាំទ្រការសិក្សារបស់កូនលោកអ្នក

·         ការចូលរួមចាប់ផ្ដើមដោយការដឹងអំពីអ្វីដែលកូនរបស់អ្នកគួរតែសិក្សា។ នៅពេលលោកអ្នកដឹងអំពីអ្វីជាការរំពឹងទុក និងមានទំនាក់ទំនងយ៉ាងទៀតទាត់ជាមួយនឹងគ្រួបង្រៀននោះ។ លោកអ្នកអាចជួយត្រួតពិនិត្យ និងគាំទ្រដល់ការរីកចម្រើនរបស់កូន ហើយស្វែងរកជំនួយបន្ថែមតាមតម្រូវការ។

·         ចូលរួមកម្មវិធីរាត្រីវិលត្រឡប់មកសាលារៀនវិញ

·         ចូលរួមសន្និសិទ្ធមាតាបិតា-គ្រូបង្រៀន

·         និយាយជាមួយគ្រូបង្រៀនឱ្យបានទៀងទាត់

·         និយាយជាមួយកូនលោកអ្នកឱ្យបានញឹកញាប់

·         ធ្វើទស្សនកិច្ចសាលារៀន

·         តស៊ូមតិដើម្បីកែលម្អសាលារៀន

·         ស្មគ្រចិត្តជួយធ្វើកិច្ចការនៅក្នុងសាលារៀនកូនរបស់លោកអ្នក

២.២.៤.៣ ការទទួលខុសត្រូវរបស់មាតាបិតាក្នុងការយកកូនមកដាក់ និងទទួល

            ពួកគេចេញពីសាលារៀនវិញ

·         ត្រូវទទួលខុសត្រូវដឹកជញ្ជូនកូនដោយសុវត្តិភាពទាំងទៅទាំងមក

·         មើលថែកូនក្នុងអំឡុងមុនពេល និងក្រោយពេលរៀន

·         ទទួលយកនូវឯកសារពាក់ព័ន្ធនិងកំណត់ត្រាសិស្សតាមច្បាប់ វិន័យសាលា

·         ទទួលខុសត្រូវលើការពិនិត្យ និងចារលើសៀវភោតាមដានការសិក្សារបស់កូន

២.២.៤.៤.លក្ខណៈក្នុងការជួយកូនឱ្យរៀនបានល្អនៅសាលារៀន

·         គ្រប់គ្រងពេលវេលារបស់កូន

·         រៀបចំឯកសារឱ្យមានរបៀប

·         ជ្រើសរើសកម្រឹតសៀវភៅសម្រាប់កូន

·         បង្រៀនកូនឱ្យចេះប្រើប្រាសវចនានុក្រម

·         រកដៃគូររៀនសូត្រសម្រាប់កូន

២.២.៤.៥.របៀបជួយធ្វើគេហកិច្ចរបស់កូនលោកអ្នក

·         ផ្ដល់កន្លែងស្ងាត់ឱ្យកូនលោកអ្នកធ្វើគេហកិច្ចដែលគ្រូដាក់ឱ្យជារៀងរាល់ថ្ងៃ

·         បង្កើតទំលាប់ធ្វើគេហកិច្ចតាមម៉ោង កាលវិភាគត្រឹមត្រូវ

·         ពិនិត្យមើលកិច្ចការដែលកូនលោកអ្នកធ្វើពីដើមដល់ចប់

·         កត់ត្រាបញ្ហាដែលកើតមាននៅក្នុងគេហកិច្ចនឹងផ្ញើជូនគ្រូទទួលបន្ទុក

២.២.៤.៦ គន្លឹះក្នុងការយល់ដឹងអំពីកូន

·         រកឱ្យឃើញពីចំណុចខ្លាំង និងចំណុចខ្សោយនៃមុខវិជ្ជារបស់កូន រួចធ្វើការកែលម្អ

·         ស្វែងយល់ពីដំណេករបស់កូន

·         បញ្ហានៃភាពទៀតទាត់ និង មិនទៀងទាត់របស់កូន

·         ទំនាក់ទំនងរវាងការដាក់កិច្ចការផ្ទះ និងការកែកិច្ចការរបស់គ្រូ

·         ស្វែងយល់ពីវិធីសាស្រ្តធ្វើតេស្ដរីកចម្រើនការសិក្សារបស់កូន និងវិធីសាស្រ្តវាយតម្លៃការសិក្សា

·         កំណត់អាទិភាពលើវិស័យដែលត្រូវជួយកូន

·         សិក្សាពីភាពស៊ីគ្នារវាងកម្រឹតថ្នាក់ និង​សមត្ថភាពកូន

·         ស្គាល់ប្រភេទមិត្តភក្កិរបស់កូន

·         រកវិធីដើម្បីជួយកូននៅផ្ទះ[13]

២.២.៤.៧ គាំទ្រ និងចូលរួមរៀបចំសម្ភារបរិក្ខាលាងសម្អាតដៃ និងដុសសម្អាត

            ធ្មេញព្រមទាំងប្រដាប់ដាក់ច្រាស់ដុសធ្មេញ

·         ចូលរួមដោះស្រាយដើម្បីឱ្យសាលារៀនមានទឹកប្រើប្រាស់គ្រប់គ្រាន់ សម្រាប់សកម្មភាពអនាម័យ

·         ផ្សព្វផ្សាយ និងរកការគាំទ្រពីអ្នកដឹកនាំសាសនា និងផ្នែកពាក់ព័ន្ធដើម្បីគាំទ្រដល់ការអនុវត្តគម្រោងនៅសាលារៀន

·         ចូលរួមកិច្ចប្រជុំតាមការគោរពអញ្ជើញរបស់គណៈគ្រប់គ្រងសាលារៀន ដើម្បីស្វែងយល់ពីវឌ្ឍនភាពនៃការអនុវត្តគម្រោង និងដោះស្រាយបញ្ហាប្រឈមនានា

·         ធ្វើជាគម្រូ ដោយលាងសម្អាតដៃ និងដុសធ្មេញ ព្រមទាំងរំឭកដល់សមាជិកគ្រួសារឱ្យដុសសម្អាតធ្មេញ ជាពិសេសមុនពេលចូលរគេង

·         ធានាថាមានសាប៊ូ ច្រាស់ដុសធ្មេញ និងថ្នាំដុសធ្មេញសម្រាប់ប្រើប្រាស់នៅផ្ទះគ្រប់គ្រាន់ដើម្បីបង្កលក្ខណៈឱ្យសមាជិកគ្រួសារទាំងអស់ជាពិសេសកូនតូចធំធាត់ប្រកបដោយសុខភាពល្អ។[14]

ជំពួកទី៣

វិធីសាស្រ្តក្នុងការស្រាវជ្រាវ

៣.១ ទីតាំងនៃការស្រាវជ្រាវ

          សាលារៀនអនុវិទ្យាល័យទឹកថ្លាត្រូវបានជ្រើសរើសជាទីតាំងស្រាវជ្រាវ ព្រោះ

Ø  សាលារៀនអនុវិទ្យាល័យទឹកថ្លាជាគ្រឹះស្ថានអប់រំរដ្ឋដែលស្ថិតនៅក្នុងទីប្រជុំជន និង មានសាលាបឋមសិក្សាចំណុះចំនួន៤

Ø  មានចំនួនសិស្សទាំងពីរភេទគ្រប់គ្រាន់សម្រាប់ធ្វើការស្រាវជ្រាវ

Ø  ត្រូវបានជ្រើសរើសជាសាលារៀនស្អាតក្នុងផែនការរបស់ក្រសួងរយះពេល៣ឆ្នាំ

Ø  មានបុគ្គលិកបង្រៀនច្រើនជាងសាលាអនុវិទ្យាល័យនានាក្នុងក្រុង

 

រូបភាពទី១ ផែនទីសាលារៀនអនុវិទ្យាល័យ ទឹកថ្លា

៣.២​ ប្លង់ស្រាវជ្រាវ

៣.៣ ទំហំ និង វិធីសាស្រ្តជ្រើសរើសប៉ាន់គំរូ

          ៣.៣.១ ទំហំគំរូប៉ាន់

          វិធីសាស្ត្រ Quota Sampling ត្រូវបានយកមកប្រើប្រាស់ដើម្បីកំណត់ទំហំសំណាកសម្រាប់ ឆ្លើយនឹងកម្រងសំណួរចំនួន ២០០ នាក់។

តារាងទី១

ទីតាំងស្រាវជ្រាវ	អ្នកចូលរួម	មុខងារឬតួនាទី	ចំនួនគំរូប៉ាន់ត្រូវសម្ភាសន៍
សាលារៀនអនុវិទ្យាល័យ ទឹកថ្លា	ថ្នាក់ទី៧	សិស្ស	៤០នាក់ ស្រី ២០ នាក់
	ថ្នាក់ទី៨	សិស្ស	៤០នាក់ ស្រី ២០ នាក់
	ថ្នាក់ទី៩	សិស្ស	៤០នាក់ ស្រី ២០ នាក់
	លោកគ្រូអ្នកគ្រូ	បង្រៀន+គណៈគ្រប់គ្រងសាលារៀន	៤០នាក់ ស្រី ២០ នាក់
	អ្នកពាក់ព័ន្ធផ្សេងៗ	មាតាបិតាសិស្ស	៤០នាក់ ស្រី ២០ នាក់
សរុប			២០០ នាក់ ស្រី​១០០នាក់

          ៣.៣.២ វិធីសាស្រ្តជ្រើសរើសគំរូប៉ាន់

ដោយសារតែមិនដឹងចំនួនសំនុំសាកលច្បាស់លាស់ ព្រោះមានការពិបាកក្នុងការស្នើរសុំទិន្នន័យ

ពីជំនាញផ្សេងៗ ដូចនេះការជ្រើសរើសសំណាកសម្ភាសន៍ត្រូវបានធ្វើឡើងតាមវិធីសាស្រ្ត ២គឺ Quota Sampling (Non-Probability) ក្នុងការជ្រើសរើសសំណាក ចំនួន​ ២០០​ នាក់ ដែលជាសិស្សានុសិស្សសិក្សានៅក្នុងសាលារៀនអនុវិទ្យាល័យទឹកថ្លា លោកគ្រូអ្នកគ្រូបម្រើការនៅក្នុងសាលារៀន និងអាណាព្យាបាលសិស្សនៅក្នុងសង្កាត់ទឹកថ្លា  ចំនែកឯ Stratified Sampling (Probability) វិញ  ត្រូវបានយកមកប្រើក្នុងការបែងចែក យកចំនួនប្រុសស្រីស្មើគ្នាជាលក្ខណៈសមាមាត្រដែលត្រូវឆ្លើយសំណួរដោយខ្លួនឯង។

៣.៤ ឧបករណ៏ក្នុងការស្រាវជ្រាវ

ដើម្បីទទួលបានព័ត៌មានជាក់លាក់ក្នុងការស្រាវជ្រាវនេះ យើងប្រើប្រាស់ឧបករណ៍កម្រងសំណួរធានាគុណភាពកម្រឹតមធ្យមសិក្សារបស់នាយកដ្ឋានធានាគុណភាព។

សំណួរស្រាវជ្រាវគឺត្រូវបានបង្កើតឡើងជាទម្រង់សំណួរបើក និងទម្រង់សំណួរបិទសម្រាប់អ្នកចូលរួមផ្ដល់ចម្លើយ នៅអនុវិទ្យាល័យទឹកថ្លា ក្រុងសិរីសោភ័ណ។​ សំណួរស្រាវជ្រាវនេះនឹងត្រូវរៀបចំឡើងដោយចែកទៅតាមផ្នែកសំខាន់ៗដូចខាងក្រោម៖

ផ្នែកទី១៖ ស្ថានភាពទូទៅរបស់អ្នកចូលររួម

·         អាយុ

·         ភេទ

·         មុខរបរ

·         កម្រឹតវប្បធម៌ទូទៅ

ផ្នែកទី២៖ បរិយាកាសសាលារៀន

·         បរិស្ថានជុំវិញសាលារៀន

·         បរិស្ថានថ្នាក់រៀន

·         បរិយាកាសដឹកនាំគ្រប់គ្រង

ផ្នែកទី៣៖ ប្រសិទ្ធភាពនៃការរៀន និងបង្រៀន

·         កត្តាសិស្ស

·         កត្តាកម្មវិធីសិក្សា

·         កត្តាគ្រូ

·         កត្តាចូលរួមរបស់អាណាព្យាបាល

៣.៥ ភាពជាក់លាក់ និងត្រឹមត្រូវនៃកម្រងសំណួរ

ប្រើប្រាស់ក្របខណ្ឌត្រួតពិនិត្យតាមដាន និងវាយតម្លៃសាលាមធ្យមសិក្សាធនធានរបសនាយកដ្ឋានធានាគុណភាពអប់រំនៃក្រសួងអប់រំ យុវជន និងកីឡាឆ្នាំ២០១៨។សូចនាករបែងចែកជាទម្រង់ដូចខាងក្រោម៖

៣.៥.១ ទម្រង់ស្វ័យវាយតម្លៃសាលារៀន

ទម្រង់នេះ គឺសម្រាប់នាយកសាលារៀនដែលជាអធិការកិច្ចអចិន្រ្តៃយ៍ ធ្វើការវាយតម្លៃមេត្រីភាពសាលារៀនរបស់គាត់។នាយកសាលារៀនប្រើឯកសារនេះសម្រាប់ជាជំនួយក្នុងការកំណត់សកម្មភាពដែលអាចយកមកអនុវត្តដើម្បីសម្រេចវត្ថុបំណងក្នុងផែនការអភិវឌ្ឍន៍សាលារៀន

៣.៥.២ ទម្រង់ស្វ័យវាយតម្លៃថ្នាក់រៀន

ស្វ័យវាយតម្លៃថ្នាក់រៀនជាឯកសារសម្រាប់នាយកសាលារៀន ក៏ដូចជាប្រធានក្រុមបច្ចេកទេសធ្វើអធិការកិច្ចគ្រូបង្រៀន និងសម្រាប់គ្រូបង្រៀនធ្វើការវាយតម្លៃសកម្មភាព និងលទ្ធផលនៃការបង្រៀនដោយខ្លួនឯង។

៣.៥.៣ ទម្រង់ស្ទាប់ស្ទង់មតិយោបល់ មាតាបិតាសិស្ស/សហគមន៏

ទម្រង់នេះគម្បីបំពេញដោយគណៈកម្មការទ្រទ្រងសាលារៀន ឬក្រុមប្រឹក្សាឃុំ សង្កាត់៣.៥.៤ ទម្រង់ស្ទាបស្ទង់យោបល់សិស្ស

៣.៦ វិធីសាស្រ្តវិភាគទិន្នន័យ

          ៣.៦.១ វិភាគទិន្នន័យបរិមាណវិស័យ

  ទិន្នន័យដែលបានមកពីការធ្វើសម្ភាសន៍  តាមកម្រងសំណួរដែលបានធ្វើការស្រាវជ្រាវ គឺត្រូវបានចុះកូដ មុនពេលវាយបញ្ចូលទៅក្នុង MsExcel និង​ SPSS ជំនាន់ទី២២ ។  ទិន្នន័យនេះត្រូវបានវិភាគដោយប្រើកម្មវិធី MsExcel និង SPSS ។​  ការវិភាគត្រូវបានធ្វើឡើងក្នុងការពណ៌នានូវ​​​  អថេរស្ថិតិក្នុងតារាង  និង​តារាងខ្វែង (Crosstabs) ត្រូវបានយកមកប្រើប្រាស់ និងវិធីតេស្តសិ្ថតិ មួយចំនួនទៀតរួមមាន

៖

·         មធ្យម (Mean)

·         ភាគរយ (Percentage)

·         តារាងប្រេកង់ (Frequency)

·         អតិបរិមា (Maximum)  និង អប្បបរិមា (Minimum)

·         ក្រាហ្វិក (Graph)

          ៣.៦.២ វិភាគទិន្នន័យគុណភាពវិស័យ

ទិន្នន័យដែលប្រមូលបាន នឹងត្រូវយកទៅសំយោគបញ្ចូលគ្នា ហើយទាញចេញមកដើម្បីធ្វើការបញ្ជាក់ ឬបង្ហាញ អំពីស្ថានភាព និងលទ្ធផលដែលចេញពីទិន្នន័យបរិមាណ។  ហើយទិន្នន័យនេះនឹងត្រូវបានប្រើតាមវិធីសាស្ត្រ Rang   SWOT  និង Quotation ។

·         Rang ប្រើសម្រាប់ចាត់ចំណាត់ថ្នាក់

·         SWOT ប្រើសម្រាប់វិភាគទៅលើកត្តាខាងក្នុង និងកត្តាខាងក្រៅ

·         Qoutation ប្រើសម្រាប់ស្រង់យកពាក្យសម្តីសំខាន់ៗរបស់អ្នកផ្តល់បទសម្ភាសន៍។

·         EFA: Exploratory Factor Analysis

៣.៧ រយះពេលនៃការសិក្សាស្រាវជ្រាវ

ខាងក្រោមជាតារាងពេលវេលានៃការអនុវត្តការងារស្រាវជ្រាវគិតជាសប្ដាហ៍ស្មើនឹងរយះពេល៣ខែ

កិច្ចការត្រអនុវត្ត បញ្ចប់ការសរសរនិក្ខេបបទត្រឹមរយះពេល៣ខែ

ការងារត្រូវអនុវត្តតាមសប្ដាហ៍នីមួយៗ

១

២

៣

៤

៥

៦

៧

៨

៩

១០

១១

១២

សរសេរគម្រោងស្រាវជ្រាវ

រំលឹកទ្រឹស្ដី

រៀបចំសំណួរ

ប្រមូលទិន្នន័យ

វិភាគទិន្នន័យ

របាយការណ៍ចុងក្រោយ

---

[1] ចក្ខុវិស័យវិស័យអប់រំឆ្នាំ ២០៣០

[2] សៀវភៅផែនការយុទ្ធសាស្រ្តចតុកោណរបស់រាជរដ្ឋាភិបាល ដំណាក់កាលទី៤ និតិកាលទី៦។

[3] ក្រសួងអប់រំ យុវជន និង កីឡា៖ សៀវភៅក្របខណ្ឌពិនិត្យតាមដាន និង វាយតម្លៃសាលាមធ្យមសិក្សាធនធាន ទំ.៦ ,ខែធ្នូ ឆ្នាំ២០១៨

[4] John Sullivan, Leading Value and casting shadow: Moral Dimensions of school leadership,September 1997

[5] Babatope Kolade Oyewole , Reposition Secondary School Adminstration for Quality assurance in Ekiti State,Nigera,2013

[6] Marzano, Waters, and McNulty,School Leadership that Works: From Research to Results, 2005

[7] (សៀវភៅសិស្សសាលា និងសមាគមន៍ ២០១៨)

[8] ( W.Cullen et.all, The Impact of Texas Public School Nutrition policy on Students’ Food sectection and Sales in Texas 2004)

[9] ( Charlotte Silen and Lars Uhlin,Self-directed learning – a learning issue for students and faculty,2008)

[10] (A Durlak et all,The impact of enhancing students’ social and emotional learning : A meta analysis of school-based universal interventions,2011)

[11] ក្រសួងអប់រំ យុវជន និងកីឡា,សៀវភៅក្របខណ្ឌពិនិត្យតាមដាន និងវាយតម្លៃសាលាមធ្យមសិក្សាធនធាន,ខែធ្នូ ២០១៨

[12] ក្រសួងអប់រំ យុវជន និង កីឡា,សៀវភៅគោលនយោបាយស្ដីពីគ្រូបង្រៀន,​ថ្ងៃទី២៧ ខែ ឧសភា ឆ្នាំ ២០១៣

[13] (Oakland Unified School District , សៀវភៅសិស្សសាលា និងក្រុមគ្រួសារ ២០១៨)

[14] (ក្រសួងអប់រំ យុវជន និងកីឡា,សៀវភៅណែនាំសម្រាប់សាលារៀន និង សហគមន៍ ទំ.៥២, ២០១៤)